सप्रेम नमस्कार,

गोरेगावकरांची लाडकी ‘अभि’, अ. भि. गोरेगावकर इंग्‍लिश स्‍कूल, नावात ‘इंग्‍लिश’ असलेली गोरेगावातली मराठी शाळा. असंख्य मुले, तरुण, चाळीशी-पन्‍नाशी-साठी, अगदी ऐंशी पार केलेलेही अनेक ज्‍येष्ठ, आजी आणि माजी विद्यार्थी म्हणून या शाळेचा ‘अभि’मान मिरवतात. 1940 साली दूरदृष्टी असलेल्या काही शिक्षणप्रेमींनी गोरेगावातील मुलांना माध्यमिक शाळेची सोय मिळावी या विचारातून ही शाळा सुरू केली, पाठोपाठच ‘दि शिक्षण मंडळ, गोरेगाव’ या संस्थेचीही स्थापना झाली.

‘कला ज्ञान क्रीडा’ हे बोधवाक्‍य असणार्‍या शाळेने विद्यार्थ्यांच्‍या अनेक पिढ्या घडवल्‍या. अभ्यासाइतकेच कला आणि कौशल्‍ये, मैदानावरचे खेळ यांना प्राधान्‍य देत त्‍यांच्‍या व्‍यक्‍तिमत्त्व विकासाला हातभार लावला. काळानुसार बदलत्या शैक्षणिक गरजा ओळखत मंडळाने 1999 - 2000 पासून मराठी माध्यमातील पूर्वप्राथमिक आणि प्राथमिक शिक्षणालाही सुरुवात केली. आज डोसीबाई जीजीभॉय बालविहार, डोसीबाई जीजीभॉय प्राथमिक शाळा आणि अ. भि. गोरेगावकर इंग्लिश स्कूल या तीन शाळांमधून 700 हून अधिक विद्यार्थी आनंदाने शिक्षण घेत आहेत. त्यांच्यासाठी आधुनिक तंत्रज्ञानाची ओळख करून देणारे अद्ययावत कमला मफतलाल मेहता संगणक केंद्रही कार्यरत आहे. शाळेचे प्रशस्त मैदान हा आपला अभिमान आहे. अनेक खेळाडू या मैदानावर तयार झाले आहेत.